#Topa Jesu hong kum kik cianga thupiang dingte:*
1. Khrist sunga misi sate hong phong kik masa phot ding hi. 1Thes 4:16:17.
2. Ahing lai midikte mitphiat kal lo-in kikhel ding hi. 1Kor 15:52.
3. Hong thokikte leh akikhel midikte in Topa na dawn ding uh hi. Isa 25:9.
4. Mi gilote lau in kap ding uh hi. Mg 6:14-17.
5. Ahinglai migilote Topa hong paina vanglian in sulum ding hi. 2Thes 2:8.
6.Tua hun-a thawhkikna pen, thawhkikna masa kici hi. Mg 20:6.
7. Satan khau kikhih ding hi. Mg 20:1-3.
Topa leh Gupkhiat mite vantung ah kahto ding a, leitung
ahawm in nusia ding uh hi. Kum 1000 sung sawt ding hi. Tua hun sung om zia ding te.
1. Satan pen, mundangah apaikhia thei lo dingin khau kikhihcip phot hi. Mg 20:1-3.
2. Mi gilote misi hicip lai tadih ding uh hi. Mg 20:5.
3. Leitung hawmsuak in meel le thang zong nei lo ding hi. Jer 4:23-26.
4. Midikte in migilote danthuak zah dingin vantung ah thukhen nasem ding uh hi. Mg 20:4.
5. Midikte in dawite danthuak zah ding zongh, khensak ding uh hi. 1Kor 6:2.
Hi thu ih et ciangin leitung ah mi gilote leh Dawite kikop in
hong bawlsiat gawpgawp na te khawng uh, akiciamtehna laite, gupna ngah mite in lem in amaute thu khensak ding ci ahih manin, tu laitaka thumaan zuite in lungduai takin ih thuak zawh tentan ding ut huai pha deuh sak hi. Gentehna, Na zi mi in hong buansak leh, tu in thuk nai lo-in Pasian bang ko lel leteh, tua ni ciangin nangma thu khen suak zaw ding hi. Mg 20:12.
*Kum 1000 abei ciangin thupiang dingte:*
1. Midikte leh khuapi siangtho, thukhen nasep zo ta a, leitung ah hong tuak suk hi. Mg 21:12.
2. Satan tawmvei sung adingin akikhihna pan kikhah kik pak phot ding hi. Mg 20:7.
3. Migilote hong thokik uh a, khuapi siangtho sim dingin hong kiim um uh hi. Mg 20:9.
4. Migilote amau gamtatna ciat tawh kituak in, kihal tum ta ding hi. Mg=20:14.
Hih misite omzia ih gen ciangin sih tawntungna leh hin'
tawntungna zongh theitel dingin hoih hi. LST in hih ih pumpi sihna masa pen, Ihmutna ci bek hi. Ih ut a ih ut kei zong khatve teitei atho kik lai ding, ih hihna hang hi. Kamsangpa Ezekial mangmuhna, alian 37 sung a, thu ih et ciangin, ut taleng, ut ta kei leng, khatvei ciangin hansung pan ahi a, tuipi sung pan, meikangtum te nangawn hi ta leh, pan in, Topa in hong kaikhawm kik dinga, nungta kik ding ih hi hi. Mg 20:13. Tua panin asia-a gamta mite meikuang sungah, apha-a gamta mite pen nuntak tawntungna hong pia ding hi. Jn 5:28-29.
Tawntung nuntakna leh sihna, LST sunga ih muh bang gen ni. Tua alehlam tuak tawntung kimang thute ah, tawntung sihna pen gen masa dih ni. Mg 20:9 sunga, mawh maisakna ngah lote, khuapi siangtho kiim-um a, galdo dinga hong mainawt lai takun, van panin meikuang kiasuk in amaute valhtum hi, ci hi. Vs 14 ah, Tua pen, nih vei na sihna hi a, atawntung sihna, akiphong kik ngei nawn lo ding, sih paisuakna hi, ci hi. Nah 1:9 ah, amaute beisiang dinga, gitlohna peuhmah tho kik ngei nawn lo ding hi, ci hi. Mg 20:12 ah, amaute dan thuakna pen, amau gamtat ciat bang thuak ding uh hi, ci hi.
Mal 4:1 ah, Mi gilote pen meikuang in haltum dinga, azung ahiang dongin kangtum mang ding hi.(Azung-Satan; ahiang-athu zuite) vs 3 ah, tua akangtumte katna meivu te, na khetul uh tawh na sik ding uh hi, ci hi. Tua mei pen, mi pawlkhatte upmawh bangin kuang ngitnget hi leh, ih khe tawh ki tuan ngam lo ding hi. Tua mei in, ahal dingteng akattum khit ciangin mit kik ahihna kimu hi. Isa 47:14 ah, akuan' paisuak cih thadah in, ih khuadam hen la, awi ni ci leng zongh, awikhop ding meilum om nawn lo hi, ci zaw hi. Jude 1:7 ah, Tua meikuang namte tawh Sodam khua leh Gomorra khua zongh na kihal ngei zo a, mite in tua tawntung meikhuang namte omzia ateltheih nading uh etteh ding lim in kikoih hi, ci hi. Tu in, tua Sodom khuapi mun ah, meikuang nawn lo-in, Sii tuipi vuung zaw lai hi. Tawntung meikuang cih pen, mit ngei lo meikuang peuh kici ahih manin, akuang denkeei paisuak cihna hi lo in, tua meikuang namte in ahal ciangin ahal ding khempeuh atummang mateng mit lo cihna leh, ahaltumsa nate pen, piang kik zo ngei nawn lo-in atawntung kimang hi, cihna hi zaw hi. Tua mei tawh kihal mawhneite leh dawite zongh, thokik ngei nawn lo ding, si tawntung ding cih na hi zaw hi.
Ps 37:10,20 ah, Amaute hanciam takin na zong dinga, namu nawn kei ding hi, ci leuleu hi. Bangci zia-a, hanciam taka zong mikmek ding hiam? cihte ngaihsut kul hi. Akihal ding lai uh in, khuasung pan khuapua-a omte thei lai ding, ci hi. Mi gilo ahi ta zongin, na nu na pa khat tua lakah kihel leh, akihal ma in a omna mukha lecin, akihal khit ciangin, "den-a, tua ka muhna hi lai teng hi mah veh aw, aguh neng kia beek a om lai hiam" ci-in na zon' hangin kangtum mang ahih ciangin na mu nawn kei ding hi, acihna hi. Amaute kaat na meivuu na khettul tawh na sik ding hi, ci hi. Obadiah 16 ah, amaute khatvei zongh a om khia ngei lo mah bang kik ding hi, ci hi. Tua manin, 2Pet 2:9 ah, amaute kisiatcip paisuakna ngak in kikhol khol kinken hi, ci hi. Topa in, "Mi gilote, bang hangin si teitei se ding uh hiam? Kiheikhia uh henla, nungta uh hen. Amaute sihna ah ka lungdam kei hi" ci hi. Eze 33:11. Hih mun tawh ih et ciangin, mi pawlkhat te upna Hell meikuang sungah mi gilote, si lah si thei lo, na sa in diang au-au niloh tawntung ding hi, ci-a upna ngiau mawk pen, Satan deihna hi a, Khuavannuai a mikhempeuh in, Pasian pen, agilo pha mahmah, mimawhte akihal ciang banga muhnop sa mai a, akhut sialki in atum niloh ding bang pian in kimu ciat hen la, Pasian pen mudah tek le-uh adeihn hi, ci hi. A tatak in bel, Pasian in, mihing te ih thuaksiat ding hong deih lo a, hong khasiat mahmah in, mawhna lampi pan kihei khia in nungta thei leng, hong deihsak in, alungdam ding ahih na na gen hi.
By,Kimnu/nunu
No comments:
Post a Comment