# PASIN THUKHAM !!
Thukham in Mi hingte hoih tak in ih gamtat theih loh na ding in hong khak tan hi peuh mah lo hi. Thukham manphat na leh a thupit zia atheilo mi pen hehpih huai hi. Tua ahih man in Lai SiangTho sung ah Pasian ka it hi ci napi - in a thukham a zuilo mi-in zuau thu genpa ahi hi. Mangmuhna=12;17. na ah gen hi.
Hotkhiat na ih cih in Pasian' nasep ahi hi. A sisan hongbuak khiat man a, Gupkhiatna ki ngah pah hiam? Hotkhiatna in bang a hiam? Bang hang in mihingte hotkhiat ding kisam hiam? Hong honkhia in kua hiam? Koicih hong hotkhiat hiam? Dawimangpa Lucifer, Sila, asuak Mihingte Singlamteh tungpan a ma si santawh honglei in hong tan khia hi.
A tom in cipak leng Dawimangpa khutsung pan hong hotkhiat pen Tawntung gimna Hell pan hong honkhia hi ci-in na lak leh khial ding hi teh." Tawntung nopsakna vantunggam leh gimna Hell gampan ni tawpni ciang ading Pasian in hong kamciamna mun ahi hi.
Israel mite pen Tuuno sisan tawh a mawhna uh maisak in- Paikhiatna=12;12-13, Sihna pan gumkhia a Santuipi kantan pih in Igypt gam a sila dinmun pan a hotkhiat sa hi. Saltan na pan a hotkhiat hang in Topa thupiakte zuilo uh a hih man in Cannan gam a tun ma-un Gul tuk in tampitak si uh hi. Gamlakvakna=21;6, Ei te in zong Zeisu in a sisan tawh hong tatkhiatsa hi hang, A ma thukhamte zuikei le hang hong ciapsa gam nuam tungtakpi ding ih hi hiam?
Bang hang hiam? cih leh Vantung mite lak ah apil pen a hoihpen ahi Lucifer zong dawimangpa suak lai hi ven ! A tha nem ei leitung mite a ding Hell pen tun ol mahmah khalai ding hi. Pasian in ei leitung mite suakta tak a ih khensatna pen hongkhak lo hi. itna zong hong tang nget lo hi. Mihingte lam pan telngiat a UPna leh Itna bek hongngak hi. Ei ma kisaktheihna ,kiphasak na leh Lungtang khauhna tawh na nial leh nang leh nang Hell kipuak hiteh. Hong ki gumlo hilo hi.
Thukhamte a thupitna Lai SiangTho luisung ah en leeng Pasian in Adam leh Eve pen Eden huan sung nuam tak in a omsak mah bang in Thukham khat napia hi. Piancil=2;17, A hi zong in Adamte Nupa in Topa ,piak thukhamte palsat uh a hih man in Nopsakna hongtan lawh uh hi. Noahte Innkuan in Topa thupiakte mang uh a hih man in Tuiciin tun na pan suakta uh hi.Piancil=6;13, Pasian in Thukham 10 tawh a ma deihna honglak hi. Pasian mahmah in Suangpeek tung ah tua thukhamte hong gelh hi.piancil=31;18, Mual tung pan Moses hongtuaksuk ciang in Bawngno lim bia in a om Israel mite a muhciang in heh mahmah a, Thukhamsuangpek lei lak den-na hi. Paikhiatna=32;19, A hizong in Moses in a ngetkik leh Pasian inzong pia kik hi. Thukhamte thupi lo a hih leh Pasian in zong na pia kik lo ding hi.
Hih thukham singkuang hang in Pasian in na lamdang tampi piangsak hi. Jordan gunpi kantan pih hi. Joshua=4;9-11 Jerikoh Laakna Joshua=6;1-20, Jerusalem biakinn pi sung ah zong a siangtho pen mun ah koih uh hi. Pasian in Israel mite sung ah ka thukham ka koih ding a, amaute lungtang tung ah ka gelh ding hi Jeremiah=31;33, Thukham suangpi pen BC 587 Kum Nebukhanezzar kumpi sepsung in siamang hita mah leh Lai SiangTho sung leh Thu um mite sung ah nungta den hi.
Lai SiangTho Thaksung ah zong en le hang Zeisu kiang ah mikhat hongpai a, '' Sia aw, nuntak tawntungna ka ngah na ding in , bang gamtat hoih gamta ding ka hi hiam?'' Ci-in a hong dong hi. Zeisu in ''Nuntak tawntung na sung ah na lutnop leh Thukhamte na zui - in ci hi. Mathew=5;16-17, Topa Zeisu in a gen na ah , '' Thukhamte phiat ding in hongpai hi keng, a ki cingsak zaw ding in hongpai ka hi hi. Mathew=5;17, Ka thukham a zui mite in kei hong It-te ahi hi. John=4;21,
Thukhampen bulpi 2 in ki khen a, Pasian it ding leh Midangte it ding cih ahi hi. Mathew=22;34-39, Thukham 10te sungpan apat na lam 3teng pen Pasian it na ding hi a, a dang 7teng pen Mihing khatleh khat ih ki-itna ding ahi hi. Tua a hih man in Topa Zeisu in Thukham 10 te hong hilh ahi hi. Sawltakte hun ah zong na hilh sawnsawn lai uh hi. John=5;2-3, Thukham a zuite Dawimangpa tawh kigal in om hi ci hi. Mangmuhna=12;17, Pasian in hongpiak hotkhiatna pen man ngetloh a, Hehpihna hangbek tawh hi a, eite hanciam na , thukham zuihna, hangtawh a ki ngah hilo hi. A hi zong in tua lungdamna thu tawh kituak a, nuntakna pen hanciamtak a kalsuan ding a hihi. Gamtatna om lo UPNA in a si a hihi a cih mah bang in a thukhamte kizui zolo a, ni sim in ih mawh hi, tua a hih man in thumtheihna hun pha ih ngah laitak hi a, ih kisik theih ding a, a ma thupiak te pasian ih itna tawh hanciam a, a ma deih na bang ih zuih ding ahi hi. Thukhamzuih na pen Hell kihtak man leh Vantunggam tun nop manbek hilo ding, Pasian Ih Itna tawh thukham a zuite ih hih ding thupi hi. Pasian tate pen ka Pasian uh hi bang a hi ci a, alak dingte ih hi hi.Tua a hih man in Lungsim, pumpi gamtatna te Pasian deihna tawh kituak a,akalsuan ding te hi hang a, a hamsa khatpeuh zong Pasian in honggualzawh pih ding a hihi, tua a hih man in Kha Siangtho in lungpilna leh thuman na hong guan ciat ta hen. Amen. !!
lungdam
KL-HKhai.
No comments:
Post a Comment